Bænabókin alltaf á náttborðinu
Ásdís Pálsdóttir er mikill lestrarhestur og hefur verið alla tíð. Ásdís er ættuð af Suðurlandi þó hún hafi alist upp í Austur- Húnavatnssýslu, en móðir hennar, Sigríður Guðnadóttir ólst upp að Hvammi í Holti. Ásdís er fastagestur á Bókasafninu á Selfossi og þegar hún er sótt heim er alltaf ný bók komin á náttborðið.
Hvaða bók ertu að lesa núna?
„Ég er að lesa Náðarstund eftir Hönnuh Kent, en hana fékk ég í jólagjöf. Ég lánaði hana reyndar dóttur minni og var að fá hana aftur í hendur núna.“
„Ég er svo alltaf með bænabókina á náttborðinu en í henni les ég alltaf reglulega. Síðan er ég með bókina Lifðu í gleði og fallega bók sem heitir Skyndibitar fyrir sálina sem ég les líka alltaf í reglulega.“
Hvað er besta bókin sem þú last á síðastliðnu ári?
„Það er ábyggilega bókin Svanga Manga með svarta vanga eftir Ómar Ragnarsson. Hann er virkilega skemmtilegur penni og lýsir henni á mjög lifandi hátt. Það er alveg ótrúlegt hvernig hún hefur lifað af og náð að bjarga sér.“
Bókabæirnir austanfjalls þakka Ásdísi fyrir spjallið.
